Despois de redactar... a revisar!

Coa finalidade de achegarvos un recurso útil, déixovos aquí unha recomendación para que vos animedes a coñecer e a usar os correctores ortográficos durante o curso e, de xeito xeral, no voso traballo cotián a partir de agora.

 

Para que usedes este recurso de maneira axeitada entrade na seguinte ligazón e consultade este material do Servizo de Normalización
Lingüística da USC: 
 http://www.usc.es/gl/servizos/snl/asesoramento/recursos/correctores.html

 

Está todo moi clariño: a configuración e as descargas na parte central da páxina e, sobre todo, o titorial que aparece na parte superior dereita (hai que premer en "Como funciona un corrector ortográfico").

Para coñecer outras ferramentas dispoñibles en galego podedes visitar a páxina da Secretaría Xeral de Política Lingüística. Alí atoparedes dicionarios en rede, tradutores automáticos, servizos para galeguizar o móbil...  

 É importante que se difundan entre a sociedade os novos recursos lingüísticos dos que se pode dispoñer a través da rede.

O próximo 19.05.2013 terá lugar a xornada Letras Galegas e internet, que  organiza a Secretaría Xeral de Política Lingüística en colaboración coa Secretaría Xeral de Modernización e Innovación Tecnolóxica e coa Secretaría Xeral de Medios.
Esta xornada podedes vela por internet en directo, de 10.30 h a 13.30 h, en www.cmg.xunta.es/emision/directo/directo.htm

Agardo que a información que vou publicando sexa da vosa utilidade e anímovos a que redactedes, de cando en vez, algún comentario en relación coas miñas publicacións. Aínda non vos estreastes así que... veña!!! Dádelle!

Esta bitácora tamén é vosa e de calquera persoa interesada pola linguaxe administrativa.

O bUSCatermos tamén dispoñible para dispositivos móbiles iPhone e iPad

Hoxe presentouse unha nova aplicación que permite consultar o bUSCatermos: esta base de datos de terminoloxía técnica multilingüe da USC pódese consultar a través de dispositivos móbiles de Apple. A nova app presentouse ante os medios de comunicación hoxe 17.04.2013. Deste xeito, os terminais iPhone e iPad van ser os primeiros beneficiarios desta aplicación que permite acceder a este recurso lexicográfico. Parabéns por esta aplicación!

 

O bUSCatermos

O bUSCatermos é un dos recursos lexicográficos máis amplo da nosa lingua. Trátase dunha base de datos de terminoloxía técnica multilingüe en liña que elaborou a Universidade de Santiago de Compostela (USC). Esta completa base de datos achega información acerca de máis de 155 000 conceptos vinculados a diferentes áreas especializadas: historia, xeografía, ciencias da saúde, dereito, zooloxía, botánica... Ademais das denominacións en galego, ofrécense as denominacións en castelán, en inglés e mais en portugués.

Ata o 01.10.2012 o bUSCatermos funcionaba en pechado para os membros desta comunidade universitaria, pero desde esa data toda a cidadanía pode consultar esta completa base de datos terminolóxica grazas a un convenio da USC coa Secretaría Xeral de Política Lingüística (SXPL). Xa hai 6 meses que este banco de termos é de consulta libre: calquera persoa con acceso á internet pode consultar toda a información desta base de datos dotada de 450 000 denominacións nas diferentes linguas.

Segundo os datos que achega Xusto A. Rodríguez Río (responsable da área de terminoloxía do Servizo de Normalización Lingüística da USC), neste primeiro semestre de utilización producíronse un total de 5 704 visitantes únicos, que realizaron 13 803 sesións de consulta e accederon a
56 991 páxinas.

Esta ferramenta é un dos recursos máis amplos que existe para a lingua galega. Cada entrada adscríbese a unha área temática, achégase a definición e as fontes das que se tira esta información. Recoméndovos que consultedes acotío este recurso para solucionardes as vosas dúbidas de léxico. O bUSCatermos pode ser útil para calquera persoa que busque mellorar a calidade lingüística dos seus textos en galego e mesmo noutras linguas.

Xa veredes como o bUSCatermos facilita o emprego do galego na vosa actividade profesional. Estou segura de que vos vai axudar a mellorar a calidade e a precisión dos documentos que elaboredes.

Acceso en aberto aos cursos en liña de linguaxes específicas

En setembro de 2011 empezaban a impartirse os cursos de linguaxe administrativa e xurídica do nivel medio na modalidade de teleformación. Ao ano seguinte (setembro de 2012) comezaba unha nova xeira na autoformación en galego, pero agora esta modalidade de cursos en liña ampliábase e ofertábase tamen para o nivel superior.

Un mes despois (outubro de 2012), a Secretaría Xeral de Política Lingüística colgaba na súa páxina web e en aberto os cursos de teleformación do nivel medio e axiña poderiamos tamén consultar os contidos teóricos, as prácticas de autorresolución e os recursos bibliográficos destes cursos no nivel superior. Segundo se indica nesta páxina, trátase de recursos autoformativos dirixidos a que o persoal das administracións mellore a súa competencia lingüística en linguaxes específicas galegas.

O 08.04.2013 comezaron os cursos de linguaxe administrativa galega para o persoal da Administración autonómica da Escola Galega de Administración Pública (EGAP) na modalidade presencial. Neste sentido, quero destacar que é a primeira vez en que os docentes e o alumnado de cursos presenciais poderemos botar man desta ferramenta. Invítovos a que habitualmente entredes nos difererentes contidos dos bloques de gramática, redacción e estilo, léxico, contorno, documentación e lingua oral.

A escolla dos recursos (na marxe superior esquerda) tamén é moi atinada. Ademais de bibliografía básica tamén conta coa hemeroteca e coa videoteca, poderedes tamén coñecer a lexislación xeral e mais lingüística e resolver as dúbidas de léxico se consultades acotío os dicionarios, vocabularios, compilacións e glosarios que se vos recomendan na plataforma virtual.
 

Plan de software libre de 2013

Na nosa historia recente xa case non lembramos aqueles aparatosos móbiles de hai uns anos. Hoxe en día os sistemas operativos cos que funcionan os nosos móbiles posúen unha grande importancia.  Android acada unha enorme cota do mercado nos Estados Unidos e tamén na nosa comunidade. En só dous anos (de 2011 a 2013) pasou a ser o sistema operativo de móbiles máis empregado no mundo.

Este sistema operativo de Google ten unha cota de mercado de nada menos que o 75% do mercado mundial (cando en 2011 roldaba o 60%). É dicir, que non  hai quen lles tusa! Un crecemento abraiante que, se cadra, ata sorprendeu o propio Google.

Neste sentido, creo que é unha iniciativa normalizadora moi salientable a solicitude que a Axencia para a Modernización Tecnolóxica de Galicia (Amtega) da Xunta lle realizará a Google para que traduza ao galego o sistema operativo Android.

Ademais, hoxe tamén se publica nas novas da Xunta que a finais de 2013 se coñecerá o resultado da análise exhaustiva que se está a realizar sobre a viabilidade da migración a software libre dos ordenadores dos empregados da Administración xeral.

A convocatoria dos cursos de linguaxe de 2013

Podedes consultar a Resolución do 06.03.2013, pola que se convocan, en colaboración coa Secretaría Xeral de Política Lingüística, os cursos de linguaxe administrativa para o persoal da Administración autonómica de Galicia. Esta resolución publicouse no DOG núm. 49 do 11.03.2013.

Aconséllovos que a leades devagar para saber cantos cursos de linguaxe se convocaron este ano, os requisitos dos participantes, os criterios de selección, o contido e a avaliación dos cursos, a normativa que lles afecta e mais o camiño que haberá que seguir para resolver incidencias.

Interésavos o apartado "Sexto" en que se describe a duración dos cursos: 60 horas lectivas e 15 horas de titoría presencial (ás que poderedes asistir de xeito voluntario para esclarecer dúbidas relacionadas co traballo individual e obrigatorio que teredes que presentar ao remate do curso).

A nosa bitácora

Esta bitácora tentará ser unha ferramenta de traballo para proporcionarlle recursos ao meu alumnado dos cursos de linguaxe administrativa e xurídica e a calquera que estea interesado por esta materia.

Este luns, 08.04.2013, comeza unha nova quenda de cursos de linguaxe administrativa na Escola Galega de Administración Pública de Santiago de Compostela. Titorizarei un curso presencial e espero que empreguemos acotío esta bitácora dixital para enriquecernos mutuamente.

Intentarei publicar os recursos que me parezan que poden ser do voso interese (segundo, por exemplo, onde traballedes). En canto aos cursos de teleformación, tamén vou procurar que sexa unha ferramenta que usen os meus telealumnos.

Ademais, e de cando en vez, quero propoñervos algún xogo/enigma/debate para que non pensedes que os docentes de galego e os filólogos somos moi gramaticalistas e serios. Esta materia é ben divertida... xa veredes como lle damos á lingua!

O meu bloque de contidos favorito nestes cursos é o de redacción. Redactar é fundamental para que se estableza unha boa comunicación (recoméndovos La cocina de la escritura de Daniel Cassany), algo que na linguaxe administrativa moitas veces non se produce. O outro día chegoume unha comunicación do meu banco que tiven que ler tres veces e, finalmente, non entendín. Total, que xa pasarei polo banco para preguntar o que pretendían comunicarme.

E agora, veña, esquecede que traballades como persoal da administración e poñédevos do lado do administrado. Reflexionade se algunha vez tivestes problemas para entenderdes algún documento que procedía da administración local, autonómica ou estatal.

E aí vai a miña primeira pregunta: parécevos unha actuación democrática que a administración non se comunique coa cidadanía de xeito eficaz? Por que?